Sigún pinta, la vida moernu es cumu dir contentu al mataeru, cumu quin va a otru sitiu, de visita.
Es cosa de ser ubidienti, obedecé-lo que los medios dejan caer u dicin claru cumu si jueras tú quin lo biera razonáu y meditáu por espáciu de horas.
Pudían dicilo toos los días, y toos lo encultan. Un día trés del otru, atapando lo mas gordu, y lis da resultáu. Nunca dirán que el desarrollu sinfinitu n'un mundu finitu es impusibli, ni tampocu que la carrera aceleraa de los ricos por ver quín lleva mas primeru que la competencia mos lleva al mataeru global. Si escasu, mos enseñan a sintimos grandis col reitu ajenu, el que mos apreta la soga al piscuezu.
No es igual joracá-l suelo invirtiendo, a que la invirsión caiga del cielu
El petroliu se acaba. Y el mundu prósperu con ello. Es tan claru, que a juerza de no querelo dicir, dingunu lo quier uír. Dingún pulíticu quier dicilo, por miéu a quin vota.
El petroliu se acaba. Lo del cochi, lo de los avionis, lo de los barcos de turismu y los cargueros, y lo del esfaltu de la carretera, y tamién lo que calienta las calderas.
Sigui hubiendo petróliu, peru es mas caru dir trés de lo que queda sú´l suelu que el dineru que diera de vindíu. Mala invirsión. Justu enantis de la guerra, Irak tinía la mayor reserva de petroliu del mundu ya en barrilis. Trés la guerra "democráticu y de libración" asina cumu por casolidá, pasó a ser propiedá del amigu Dick Cheney. Güena invirsión. No es igual joracá-l suelo invirtiendo, a que la invirsión caiga del cielu.
Abora estamos mitíos de cabeza nel negociu'l siglu. El negociu de veer cúmu caltienin aquellos el negociu cuandu el petróliu se acaba. Mos toca ser, ubidiciendo a otra güelta la cunsina, ucrañolis. Esmingando la bandera que jaga falta al amu, vamos a la guerra de la vida cutianu con menos munición ena jucha, sacrificándomos a juerza de veemos en vergüenza pa pasá-l mes. Dejamos arrobá-la cartera pola usura de las empresas yanquis es el nuevu patriutismu, pasalas estrechas esti hibiernu y los que vengan es el nuevu cumprumisu pola democracia y los derechos humanos, mientras acerramos primeru el juturu y aluegu el pasu a mediu mundu. Seremos lo que quieran que seamos, tragaremos lo que digan que traguemos, y marcharemos con cara de contentu al camión y dihí, al mataeru.