Dicin las vítimas del franquismu, entá rogando por que lis dejin enterrar dinamenti a los sús muertos, que jaz falta arreparación y justicia.
Franco era un español nacionalcatólicu, y el franquismu no es otra cosa que nacionalcatulicismu español nel poder, sumáu al adutrinamientu. Quin piensa u replica con arreglu al pensamientu nacionalcatólicu es, drentu de la sú cabeza, vítima del pensamientu nacionalcatólicu, vítima del franquismu. Masque tamién, de puru vítima, sea virdugu n'otra midía.
Cuandu n'esti momentu un cartel mos pruhibi tirar basura a un ríu y a un regatu su la pena d'una multa, el cartel mos está dijendo muchu del miéu a l'autoridá y pocu sobri lo malu de tirá-la basura al ríu. El cilimín que tenga pensáu tiralo, pensará u que tien que tener cuidáu de que no lu trabi nel momentu la Guardia Civil, u que debi tiralo al ríu n'un sitiu nel que no tenga el mismu letreru. Se queda col mensaji de que hai que andase con oju col que manda, y n'asulutu intiendi lo malu de contreminar. Se respeta l'autoridá cumu quin obedez, ensin atender a razonis. El cartel, quin lu jezo y quin lu intiendi al pie de la letra son vítimas del franquismu.
Somos vítimas de los cuntiníos tilivisivos franquistas. Toreros y tonadilleras. No pasaría enjamás con castellers u aizkolaris
Entá hui los programas que vein las mujeris son prensa "rosa" que atiendi a too lo que jacin los toreros y las tonadilleras, y los hijos, subrinos, primos, nietos, cuñaos y nueras de los toreros y las tonadilleras. Es cumu un cota ubligaa que se debi pagar enas casas, pola que al treviés de la teli entra una dosis diaria mínima de toreru y tonadillera. Es un restu mui vivu de la época franquista que no mermó ni un pocu. Somos vítimas de los cuntiníos tilivisivos franquistas. Toreros y tonadilleras. No pasaría enjamás con castellers u aizkolaris.
Mi cuentan que ciertos acaldis cuandu dan una cuncisión a daqui empresa arréu pidin "la caja de bombones", que nunca es justu una caja de bombonis. Ellos y esa genti que diz que toos los pulíticos roban son vítimas del franquismu, y tien especial aprivinimientu colos que no arroban, que es a los que temin. Esos caciquis nunca duran una legislatura, empalman una con otra. A l'autoridá, respetu y si escasu pasali la manu. La cunfianza nel caciqui, supiendo que siempri se puei dir a pasali la manu u regalali cualisquier clas de bombonis es otru prudutu franquista que no se acabó el día que Franco, de vieju, pinó'l zapatu.
Que el resultáu de cuarenta años de democracia "al ajillo" y mas medios de cumunicación que nunca sea que a caa añu que pasa mas genti crea que la democracia y los derechos sólu sirvi pa que creza el dilitu sólu se puei entender si la mesma democracia es vítima -cumu prudutu- del franquismu. De gatu franquista democracia michina.
Las juerzas armaas no cunucierin dinguna transición, si escasu istuvierín ajirmando por poneli cundicionis. No tuvieron que dalis dinguna anistía porque tampocu tuvierin de responder por naa enos tribunalis. Hui son un rifugiu de franquistas ancianos y simpatizantis franquistas mozos y upinan cosas cumu "arreglar" a la sú manera asuntos pulíticos, cumu jaz bien pocu nel asuntu catalán. Las juerzas armaas entá son vítimas del franquismu.
Los tribunalis democráticos que no julgarin a los militaris franquistas eran los tribunalis franquistas de cuandu Francu entá respiraba, peru ya con él muertu. Y no los cambean y los apean de la burra porque no quierin cambear ellos ni apease de la burra. Y cumu güenas vítimas del franquismu lo que mas jacemos allega a ser dicir que vae carona que tienin, que no marchan del sillón.
Antañu era inogurar pántanos, hagüañu es inogurar parquis eólicos, peru el despreciu pol contornu y la genti nativu se caltien cumu nuevu.
Aquellos "republicanos juancarlistas" que un día callarin col padri y siempri callarin jasta abora col hiju, son, los probis, vítimas del franquismu, mitíu nel sú ADN idiológicu.
Del franquismu con Francu murió él, y lo que nació no jue la democracia, sino una democracia "al ajillo" que traendo cosas nuevas que meter al pucheru quiso cumu cundción conservá-la muruza, el gustu y dellos aromas d'antañu.
Y cumu se iscuidin, las vítimas del franquismu que andan con rogativas a las estitucionis pa que saquin a los muertos de las cunetas se van a alcontrar con que cuando por fín saquin a los suyos, los metan a ellos.