Mantecón fluricíu n'un suelu muguizu | edc
Vos acordais de los tiempos de la Rebelión cívica? Sí, virís: daquella había muchu ciscu nel País Vascu col Estáu, y Cataluña andaba calienti, masque menos que abora. L'Estáu tiraba de juecis, leis, pulicías, y pulicías juera de la lei, y paez que jasta se sintiera culpabli de jacelo too en plan riprisivu, pos había un problema pulíticu que era atajáu cumu si juera un dilitu. A España li pidi el cuerpu atajá lo social cumu si juera dilitu, mas entá si el cuerpu es de las fuerzas y cuerpos de seguridad del Estado.
Qué bien lis biera viníu daquella una muvición popular que pensara pola sú cuenta lo mesmu, y no li dejara tul trebaju a los de la sentencia, el tiru y la porra. Y vae, casolidá, pos paez que sí que veno. Y las primeras caras cunucías que remanicierin a la cabeza de aquella muvición tan espontánia no eran cumisarios de pulicía, militaris, exlegionarios, Guerrilleros de Cristo Rey u facistas, no, que eran librepensadores y genti de la contracultura. Los típicos que istuvierin enas listas negras de la pulicía del régimin franquista. Eran los rojos de la barba, las gafas y la ofanda, del istilu d'aquellos que prisumían de ber curríu por lanti los grisis.
Eran genti que ajuía del facismu, y eran a veé-l facismu inclusu iscundíu drentu de los que se cunsideraban rojos, cumu si tuvieran rayos X
Cumu era genti mui liíu, que echaba el ratu en pensar muchu, crear y asuntar, lo suyu era una upinión mui asentaa, cavilaa en fríu, serena. No eran partidistas, ni acérrimos. Eran genti que ajuía del facismu, y eran a veé-l facismu inclusu iscundíu drentu de los que se cunsideraban rojos, cumu si tuvieran rayos X. Achisbaban finu. No se les engañaba tan luegu, y amás tinían una misión: iscubrili las cosas a la genti y crear una conciencia crítica, el principiu de la famosa Rebelión cívica. Salían el ún día sí, l'otru tamién, alertando a la genti del facismu que goraban, callanducu, los nacionalismos vascu, catalán, y cualisquier otru, sacáu l'español, que se conoz que por anguna razón aquél no necesitaba ser analizáu.
Arrecordais la enseñanza? Yo sí. Saltandomi –y a un tiempu, siguiéndo– la regla del Mugu, la iscribo en castellanu: Los nacionalismos responden a oscuros intereses de élites que quieren separar al pueblo, adoctrinándolo en falsos valores, para manipularlo mejor y desviarlo de la lucha por los verdaderos problemas que le atañen. Estos valores se basan en una hipertrofización del elemento identitario, que al fin y al cabo es un constructo artificial, algo que apela al instinto y no a la razón. Aumentando la preocupación por la bandera, la lengua, la tradición, se resta el interés por los verdaderos problemas que la población sufre y por tanto, debería solucionar implicándose activamente. Debemos salir a la calle a denunciar todo esto y ser una ciudadanía activa, crítica y alerta.
Yo me acuerdo de los rojos cola lición bien diprindía. Mi vien a la memoria a una cumunista del pueblu que se sintía mui asturiana quejase del asturianu y de lo asturianista ripitiendo las palabras de Gustavo Bueno (mi salto de pasu la regla del Mugu de pricurar no dar nombris). Recuerdo a Gustavo Bueno cumu filósofu materialista, naa menos. Un roju de primera línia, eno mas altu del pensamientu. Y tamién lu veo ena apresentación de Denaes, junta Santiago Abascal.
Toa esa genti críticu que aculumbraba el facismu jasta al treviés de las pareis, úlo?
Y abora veo lo que Vox propón, y mi prigunto óndi está abora la visión fina, el criteriu afiláu, la Rebelión cívica. Úlos? Toa esa genti críticu que aculumbraba el facismu jasta al treviés de las pareis, úlo? Esa genti de pensamientu filosóficu marxista, qué piensa del procesu que lleva de Marx a Denaes y de Denaes a Vox? Qué quier el marxismu español hui? Tauromaquia? Racismu? Caza? Latifundiu? Negreros agrícolas? Formación del Espíritu Nacional enas iscuelas? Pruhibición de los partíos nacionalistas y de los marxistas? Qué diz Savater? Qué diz Boadella? Qué diz Ibarrola? Úlos? Son éstos los problemas de la genti no desaparáu pol nacionalismu? Qué diz abora toa esa genti tan críticu, tan agudu, tan vacunáu contra el nacionalismu de tou esti procesu?
La disquierda española: lo primeru española; disquierda, no tantu. N'horagüena.