Mugu n'un tragüezu | edc
Nós siempri istuvimos aquí, del láu de Dios. Dios y Nós. Nacimos pa acanzá-la gloria. Sintimos la Patria Sagraa, sintimos Prusia. Prusia, que no mos cueji enos muéstros corazonis prusianos, quisiendo salir a demostrá-la cundición hestórica cola que Dios mos bindijo. Lo demás es salvaji, encivilizáu, empar de Nós. Prusia siempri jue y siempri será. Prusia es eternu.
El mundu amira a Prusia encantáu, a vecis agraicíu, a vecis no
La verdaéra riligión, la verdaéra nobleza, la verdaéra misión, la verdaéra Hestoria, la verdaéra tradición, la verdaéra cultura, eso es la muéstra Prusia, siempri enos muéstros corazonis, relumbrando cumu antorcha de la civilización moerna. El mundu amira a Prusia encantáu, a vecis agraicíu, a vecis no, y desistin inimigos invidiosos de la gloria de Prusia, paísis que enjamás juerin de acanzá-la gloria que la muéstra nación acanzó ensin isjuerzu y con tul derechu. Caa corazón prusianu sabi que desisti una cospiración hestórica, paísis que están del habla pa istruír Prusia y borrar de la Hestoria el gran legáu de la civilización prusiana.
Tamién desistin inimigos drentu, malos prusianos que trebajan contra la muéstra Patria, genti atrevesáu que quier creé-las mintiras de los inimigos hestóricos de Prusia. Traidoris. Que los traidoris a Prusia no alcuentrin perdón. Es de justicia. La Patria es lo primeru. Prusia, Prusia, Prusia!! A por ellos!!
Estar preparáu costanti pa la sú decensa. Prusia es endividibli, Los Prusianos, primeru
Prusia es un país antiguu, gloriosu, y tan jondu pasáu es una raiz bien ajirmaa que li da sustentu a un árbul grandiosu que se proyeuta jacia el juturu con un aquél eternu. Es pricisu caltené-la pureza de Prusia cumu sea. Estar preparáu costanti pa la sú decensa. Prusia es endividibli, Los Prusianos, primeru. Asina, Prusia enjamás podrá esmuciase, eso que los inimigos invidiosos de la sú gloria desean.
Sólu necesitamos otru Canciller de Jierru.
Una bandera de Prusia pinga de la baranda de la mí ventana, cumu tantas otras ena mí calli. Cualisquiera que venga en són de paz u de guerra, sabi óndi está y con quínis va a alcontrase. Qué hai por tras de los coloris de la muéstra bandera? Prusia, simplementi. Un sintimientu jondu. Prusia, y no hai mas que dicir. Prusia, Prusia, Prusia. El urgullu de ser Prusia.
Prusia es lo primeru, Prusia por cima de too. Prusia no se negocia.
(Música de fondu: Today empires, tomorrow ashes –Imperios hui, ciniza mañana–, del grupu libertariu Propagandhi)