jueves. 28.03.2024

Caridá patrióticu

El patriutismu fachuca, con muchu palabriríu no es pa allegar en dinidá y nobleza muchu mas allá que cualisquier pirrucu chicu con un trapu ena boca.

mugu221118La isla de Mogru, dicho “Mouro” en extraterrestri | edc

Cumu n'una cadena trágica, el Ser humanu paez condenáu a ajuír de sí mesmu al treviés de legionis hostilis de réplicas nacías un pocu más allá, n'esti mundu que no por grandi deja de ser minúsculu. Los emigrantis de Guatemala, a los que la culumía jaz estranjeros forzosos, son odiaos n'un Méjicu que jaz lo mesmu colos suyos y que vei cumu una enjusticia que a esos suyos los rechacin los Estaos Auníos de la mesma manera. Trespasá-las rayas es un privilegiu del ricu en dineru u de quin es ricu en miseria. El probi está mijor juera, y si no, polo menos juera de la vista, pa que no mos estropei la cena mientras celebramos tamién a la nochi el ritu diariu de la televidencia. El nacionalismu de los paísis ocidentalis, ési que tantu se pricupa de dicir que no lo es, es un capitalistómanu jondu, que se acupa de protestar de puertas ajuera pola probeza justu justu el día que se entera de que el africanu probi, el asiáticu probi, el americanu probi, el estranjeru probi, ricibi cualisquier tipu de aguda. El facistuca que anthier estaba contentu con la Ley de Vagos y Maleantes, que ahier dicía con despreciu que “quien no trabaja es porque no quiere”, abora que vei pola calli africanos a los que siempri vio cumu monos fingi pricupación polos probis españoles, luciendo una idea de humanidá tan miserabli cumu las que lucía de patriutismu, justicia, libertá, pulítica, ordin, u cualisquier otra.

Sacaba que la cosa se jiringó cuandu ajuntémos cuatru perras

Un compañeru de trebaju arrecordaba los viejos tiempos enos que la genti era mas dinu y arrimaba l'hombral y sacaba que la cosa se jiringó cuandu ajuntémos cuatru perras. Quiciabis acertaba, y el momentu nel que los seris humanos mos “nacionalizamos” sea ísi, el momentu en que tenemos y mos damos cuenta de que otru aláu no tien.

Cualisquier pirrucu chicu allega a ser asina un patriutuca; val con tener unos cuantos y dali un jugueti a unu. Pudía estar contentu y jugar con él, peru en pocu tiempu lu paseará por lanti los otros prisumiendo peru recelosu, desando que si lu vean y desein, mas pindienti d'ellos que de lu que tien. El patriutismu fachuca, con muchu palabriríu no es pa allegar en dinidá y nobleza muchu mas allá que cualisquier pirrucu chicu con un trapu ena boca.

En Guatemala son tan probis que ni tan disiquiera tienin un país probi col que acomparase y una genti a la que pruhibí-l pasu. No tienin ni un pocu de ricura colo que poder dasi el miserabli luju de ser miserabli. No puein comprar ni un pocu de patriutismu de ataqui entri jambri y jambri. Los españoles, primero, dicin los españolis que con esi urgullu paletu de tropa esdentaa d'un Cid iscunucíu vienin siendo los últimos del falsu continenti européu, demasiáu ricu y miserabli pa arreconocese una puntuca d'Asia. La justicia y caridá patrióticas vienin con un sistema de castas y con guarnición de arambri d'ispinu, cuchillas, vallas elétricas, pelotas de goma, balas, porras, jaulas y mintiras que dejan al carrilanu blancu, católicu y nativu nel cielu del lamentu hipócrita, peru tiráu ena misma calli que estaba. Mala humanidá, mala justicia, mala caridá ésa que a la final sirvi pa que li apretin las tuercas entá mas a tolos probis d'isti mundu, incluíu quin se crei ricu ena comparanza miserabli.

Caridá patrióticu
Comentarios