Mugu y Pan de Cucu, enjuntu | edc
La modélica transición española trijo un cambéu jondu ena Pulicía: primeru lis cambearin el unijormi gris a unu marrón. Y oju, que no contentos con esti cambéu entá jacierin unu mas radical y los pasarin a vistir de color azul marinu. A las autoridais del estáu de derechu no lis tembló el pulsu a la hora de tomar estas serias midías.
Claru que con semejanti purga democrática, tan jonda, nel corazón de la pulicía franquista, tamién los que llevaban las palizas enos cuartelis y las condenas de cárcil pola sú atividá pulítica tuvierin de jacer cambeos y tener un gestu pola cunvivencia pola sú parti. Los sendicalistas dejarin de jacer asambleas colos obreros a iscundías de los jefis y empenzarin a jacer cumidas y cenas de trebaju colos jefis a iscundías de los obreros.
Col tiempu el trebaju de los sendicalistas cunsistió mas en comer y cenar colos patronis y menos en llevalis la contraria
Las manifestacionis obreras empenzarin a tener un sirviciu de siguranza nel que los sendicalistas li quitaban trebaju a la pulicía al treviés de la diplomacia, que pa la guerra ya estaban ellos. Col tiempu el trebaju de los sendicalistas cunsistió mas en comer y cenar colos patronis y menos en llevalis la contraria. Allá aprindierin a hablar retorneáu cumu ellos. Y güenu, a la final mos dejarin clara una enseñanza: Los emprendedores son los que crean riqueza y nos dan trabajo. Amén.
Ya son muchas décadas por esti caminu, de manera que cuandu la tilivisión tien a bien tené-l gestu de sacar a angún sindicalista, u es un gastrosendicalista en daqui degustación neolaboral/neoliberal –deconstrucción, si es pusibli–, u es el cumunicáu de guerra sendical d'un portavoz desigenti, poderosu y popular del sindicatu mediáticu mas de moda, Jusapol.
Los emprendedores creadores de riqueza y de trabajo dierin muchu arti creando trebajos enos que la probeza es lo únicu siguru; la tilivisión echaba muchas seriis sobri el sufrimientu humanu de los ricos a las que añidió a los años otras seriis sobri el sufrimientu humanu de los pulicías, al tiempu que no programó dinguna sobri el sufrimientu humanu de la genti aselariáu, que es la mayuría. Hui es el día que la genti quier ser ricu y si no, pulicía, que amás de ser un trebaju fiju es el dar palizas, no el de ricibilas. Los sendicalistas están ya mal vistos, sacáu los de sendicatos pulicialis cumu Jusapol. Va a acabar siendo tristi que una cajera, un autónomu, una empleaa que esbolla pescáu n'una conservera, tengan que estar afiliaos a un gastrosendicatu inútil en tal de poder afiliase a unu luchaor, juerti y tan guapu, tan mediáticu, cumu Jusapol.
La tilivisión vien a sé-l departamentu de propaganda de la pulicía, el que se encarga de que la genti que lleva los porrazos mos caiga mal
Con tan poca guerra cumu dierin los sendicatos –los partíos pulíticos los dejamos pa práu–, la pulicía se caltuvo y entá se caltien en forma cola joventú, colos emigraos probis, cola genti rebecu que no aceta al estáu, akupas, y colos obreros a los que los sendicatos no cuntienin. La tilivisión vien a sé-l departamentu de propaganda de la pulicía, el que se encarga de que la genti que lleva los porrazos mos caiga mal. Aluegu mos empontigará el votu.
Y qué jue de la pulicía franquista? Sufriría muchu cola renovación del armariu roperu?
El facismu siempri jue mui amigu de la pulicía. Angún ministru socialista, inclusu, viníu del capital-sindicalismu culinariu puso de moda pa la posteridá el ponderá-la "callada labor de la policía"; se conoz que la cajera, el autónomu y la esbollaora echaban el ratu atrunillándomos los uíos a juerza de contamos cuantísimu trebajaba caúnu. El casu es que pal gustu de Amnesty International, la labor de la pulicía no sólu es callaa sino que tamién está atapaa, y enas dos cosas, pordemás. La pulicía de la modélica transición española, a pesar de las duras midías democráticas de muda de vestuariu, no anduvo estrecha de casos de turtura. Tampocu lo anduvo de exceso de celo.
Facistas que aman a las juerzas armaas; pulicías ultras, guardias ultras y militaris ultras que aman el... 'Orden y la Ley'
El facismu abora, pasáu el franquismu, es mui amigu de la pulicía, y de la Guardia Civil. El facismu suelta vivas a España, a la Guardia Civil y a la pulicía cumu si jueran suyas, cumu si juera la mesma cuadrilla ajuntándose caa añu pa cenar por navidá. Está claru que España (l'estáu), la Pulicía y la Guardia Civil se llevan mui bien, peru, qué tal se llevan España, la Guardia Civil y la Pulicía col facismu? Paez que no se llevan mui mal, tampocu. Sigún las últimas incuestas los miembros de las juerzas armaas y cuerpos pulicialis son quinis votan a trisca a la ultraderecha. Asina que se quierin n'un amor bien currispundíu. Facistas que aman a las juerzas armaas; pulicías ultras, guardias ultras y militaris ultras que aman el... Orden y la Ley. Prigúntali a ellos.
No sé, si la cosa sigui por esti caminu, creo que el Estado de Derecho, de acuerdo con la Constitución que libremente nos hemos dado, tendrá de tomar anguna midía seria pa garantizar unas juerzas armaas no tiñías de facismu; un nuevu color pal unijormi, por ejemplu.